Utgangspunktet for nettstaden er Nordre Strand - bygder
i utvikling. Utgangspunktet er vidt, og det kan byggjast ut med utallige
aspekt av kulturen i vårt lokalsamfunn, emnet er uuttømeleg, og vil
alltid kunna vidareutviklast.
Talemålet er ein
identitetsskapande faktor i lokalsamfunnet. Det er stor skilnad
på talemåten til dagens ungdom og det talemålet våre
besteforeldre snakka. Dette er ei naturleg utvikling, men det er
viktig at me kjenner til dei orda som er gått ut av dagleg
tale. Eg har fått bruke samlinga til Peter Barkve (Samlinger av
ordtak og dialektord fra Strand). Ein kan nok ikkje seie at desse
er eksklusive for Nordre Strand, dei er nok meir knytta til
Ryfylke, mange vil ein kunne kjenne igjen frå andre landsdeler, i
ein annan språkdrakt. Men dei er likefullt eit bindeledd til
våre forfedre og kulturarven vår.
Ein annan del av kulturarven i lokalsamfunnet er Stadnamn
. Mange av dei er framleis levande, mens andre er meir eller mindre
gløymde. Likevel - det er viktig at dei unge har tilgang til kunnskap om
desse namna, og kvifor det heiter akkurat slik.
Nokre av sidene er "ferdige", mens andre er nesten
tomme for stoff. Eg ynskjer at elevane skal vere med og forme dei, eit av
måla med sidene er nettopp å vekke interesse for å forske vidare innan
dei tema som blir tatt opp.
Det tredje området har eg kalla Tradisjon. Her
er det rom for mykje, eg har tatt med litt av kvart - bustad,
klede, folkeminne og ei side eg kallar helg og høgtid, som
motvekt til det kvardagslege. Desse sidene må vere mest som ein
smakebit, det finst så mykje meir, men kan hende kan det gi nokon
inspirasjon til å gå vidare på dette.
Kulturliv har eg laga plass til
på et fjerde område. Det finst mykje stoff om lag og
organisasjonar, kristenliv, skuleutvikling mm, både hos Peter
Barkve, Jan Alsvik og Asgjerd Taksdal. Det meste av dette let eg
ligge, med det for auge å ta elevane aktivt med i arbeidet med å
fylle nettsidene.
Målgruppa er fyrst og fremst elevar på NordreStrand
skule. Eg ynskjer at sidene skal vere eit supplement i undervisninga,
for å styrke identiteten og banda til nærmiljøet. Mykje av stoffet er
relatert til Ryfylkeregionen, tradisjonar, talemål og levemåte var mykje
lik for regionen, og det blir såleis eit mål å knyte banda til Ryfylke
like mykje som til Nordre Strand. For oss som har heimstaden vår her vil
det likevel vere ei av bygdene i dei gamle skulekrinsane Vatland, Voster, Fiskå eller Sørskår som er
heime.
